ബുക്ക് മൈ ഷോയ്ക്ക് തീയിട്ട് ലോക, ഓരോ ദിവസം പിന്നിടുമ്പോഴും ഡിമാൻഡ് കൂടുന്നു, ഇതുവരെ വിറ്റത് 10 ലക്ഷം ടിക്കറ്റ്

കല്യാണി നായികയായി എത്തിയ ഡൊമിനിക് അരുണ്‍ ചിത്രം 'ലോക' തിയേറ്ററിൽ മികച്ച പ്രകടനമാണ് കാഴ്ച്ചവെക്കുന്നത്. ഗംഭീര അഭിപ്രായമാണ് സിനിമയ്ക്ക് ലഭിക്കുന്നത്. സിനിമയുടെ എഴുത്തിനും മേക്കിങ്ങിനും വിഎഫ്എക്സിനുമെല്ലാം കയ്യടി ലഭിക്കുന്നുണ്ട്. ബോക്സ് ഓഫീസിലും സിനിമ കത്തിക്കയറുന്നുണ്ട്. ബുക്ക് മൈ ഷോയിലൂടെ ഇതുവരെ പത്ത് ലക്ഷം ടിക്കറ്റുകളാണ് ചിത്രം വിറ്റിരിക്കുന്നത്. സിനിമയുടെ നിർമാതാവായ ദുല്‍ഖര്‍ സല്‍മാനാണ് ഇക്കാര്യം സോഷ്യൽ മീഡിയയിലൂടെ പങ്കുവെച്ചത്.

ആദ്യ നാല് ദിവസങ്ങൾ പിന്നിടുമ്പോൾ ആഗോള തലത്തിൽ നിന്ന് 65 കോടിയോളമാണ് ലോക നേടിയിരിക്കുന്നത്. ഇത് ഒരു മലയാള സിനിമ നേടുന്ന മൂന്നാമത്തെ ഉയർന്ന നേട്ടമാണ്. മോഹൻലാൽ ചിത്രങ്ങളായ എമ്പുരാനും തുടരുമും മാത്രമാണ് ഇപ്പോൾ ലോകയ്ക്ക് മുന്നിലുള്ള സിനിമകൾ. 175.6 കോടിയെന്ന റെക്കോർഡ് നേട്ടവുമായി എമ്പുരാൻ ഒന്നാം സ്ഥാനത്ത് തുടരുമ്പോൾ തരുൺ മൂർത്തി ചിത്രം തുടരും 69.25 കോടി നേടി രണ്ടാം സ്ഥാനം നിലനിർത്തി.

അതേസമയം, ആടുജീവിതത്തിനെയും മോഹൻലാലിന്റെ ലൂസിഫറിനെയും പിന്നിലാക്കാൻ ലോകയ്ക്ക് സാധിച്ചു. 64.10 കോടി നേടിയ ആടുജീവിതം നാലാം സ്ഥാനത്തും 55.40 കോടിയുമായി ലൂസിഫർ അഞ്ചാം സ്ഥാനത്തുമാണ്. മോഹൻലാലിന് ശേഷം ഒറ്റ ദിവസം കൊണ്ട് 20 കോടി ക്ലബ്ബിൽ കല്യാണിയുടെ ലോക ഇടം പിടിച്ചുവെന്നാണ് റിപ്പോർട്ടുകൾ. ഡൊമിനിക് അരുൺ സംവിധാനം ചെയ്തിരിക്കുന്ന ചിത്രം മലയാളത്തിലെ ആദ്യ സൂപ്പർഹീറോ യൂണിവേഴ്‌സിന് തുടക്കം കുറിച്ചിരിക്കുകയാണ്.

കേരളത്തിൽ ചിത്രത്തിന്റെ പ്രദർശനം കൂടുതൽ തിയേറ്ററുകളിലേക്ക് വ്യാപിച്ചതിന് പിന്നാലെ ഇപ്പോൾ തെലുങ്ക് പതിപ്പിനും സ്വീകാര്യതയേറുകയാണ്. ചിത്രത്തിന്റെ തെലുങ്ക് വേർഷൻ ബുക്കിംഗ് ആപ്പുകളിൽ ട്രെൻഡിങ്ങായി കഴിഞ്ഞു.സിനിമയുടെ ടെക്‌നിക്കൽ വശങ്ങൾക്കും തിരക്കഥയ്ക്കും ഗംഭീര സ്വീകാര്യതയാണ് ലഭിക്കുന്നത്. എഡിറ്റിങ്ങും സംഗീതവും ക്യാമറയും ആർട്ട് വർക്കും തുടങ്ങി എല്ലാം ഒന്നിനൊന്ന് മികച്ചതാണെന്നും അഭിപ്രായങ്ങളുണ്ട്.

നസ്‌ലെൻ, ചന്തു സലിം കുമാർ, അരുൺ കുര്യൻ, സാൻഡി മാസ്റ്റർ തുടങ്ങി എല്ലാവരുടെയും പ്രകടനങ്ങളും കാമിയോ വേഷങ്ങളും കയ്യടി നേടുന്നുണ്ട്. ഇത്രയും പുതുമ നിറഞ്ഞ ചിത്രം നിർമിക്കാൻ തയ്യാറായ ദുൽഖർ സൽമാനും കയ്യടികൾ ഉയരുന്നുണ്ട്. സംവിധാനവും കഥയും തിരക്കഥയും നിർവഹിച്ച ഡൊമിനിക് അരുണിനും അഡീഷണൽ സ്‌ക്രീൻ പ്ലേ ഒരുക്കിയ ശാന്തി ബാലചന്ദ്രനും വലിയ അഭിനന്ദനം അർഹിക്കുന്നു എന്ന് അഭിപ്രായപെടുന്നവരും ഏറെയാണ്.

Content Highlights:  loka movie sells 1 million tickets through BookMyShow